Homepage > Dialetto

Poesie dialettali

Mì e le me scarpe.

Quant che on caminà

mì e le me scarpe!

quanta strada che on fat!

son 'ndati insieme a piè

su e do par strade sfaltade

e su quele querte de sass!

Adess a forzha dè camìnàr

poarete le se à consumà.

Pore le mè scarpe!

me toca butarle via

e me despias cossi tant!

Al mèrca 'l è da 'ndar

e 'naltro pèr mè 'ntoca comprar.

Pur con tute le me lagne,

chissà se ghen 'caterò de

compagne.

Co le mè vècie scarpe

tanta strada insieme on fat,

piova,neve o sol

de caminar mai ere strach!

Le mè scarpe vècie

le mè à sempre compagnà

e de caminar con mì

no le se à mai stufà.

Chissà se le scarpe nove

le mè ora ben cossi!

Pore le mè scarpe!

adess che de bus se ben pienete

'n canton 'ndarè a finir,

e pò no' basta questo

su le scoazhe 'ndarè a morir!

Pore le mè scarpe!

Scrìver.

La pena cor

sora an foi bianc

e quatro sen la assa dò

tut quel che gnen fora

dal to cor.

Parole che conta

tute le tò emozion

le tò storie

piene de fantasia.

Con passion e amor

le tò bone idee

sul foi bianc te met dò.

Tanti pensieri insieme

tante parole tacade

e cossi le nas le tò storie.

An quaderno te 'l à impienì

'n altro tel scominzia

e 'n doman magari

an bel libro te farà.

Scriver...scriver...scriver

'l è cossi bel scriver!

Cò te parla

le to parole le à le ali,

come al vent le vola via

e indrio mai pì le torna.

Cò te scrive te se segur

che impresse tel foi bianc

le resta par sempre

e ogni olta che te à oia,

col tò quaderno in man

i tò ricordi te lèderà.

Al scriver 'l è al pì bel dono

che tuti quanti on.

Veder 'na pena che cor

sora an foi bianc

e tante bone idee

cò gran passion la met do

'l è 'na bèla sodisfazhion.

Scriver 'l è davero bel

'l è an ricordo che resta

par sempre impress tel foi bianc.

'l è quasi autuno

'l està 'l è quasi ormai finì

i ombrèloi al mar

an cin alla olta

pian pian i se a serà.

Le ferie le è finide

e con gran malinconia

te torna a làorar.

I tosat fra poc

i torna à scola,

ma de studiar

nò i à proprio oia.

'l è quasi autuno

e l'aria fresca

de matina bònora

nè lo fa capir.

'l è quasi autuno

le giornade 'l è se à

belchè scurtà

gnen nòt pì bonora

e te mèt tel cor

nà gran tristeza.

'l è quasi autuno

le zhesile 'l è volade via

e solche i tò pensieri

i resta à farte compagnia

'na vita intiera.

I mè ociài.

'l è nà vita ormai

che gire sempre cò i mè ociài.

A scola a 'ndar ò tocà

cò meterli su mè à tocà..

A quel temp

in pochi i ociài portea

e chi che nò i lì avea

nà cantìlena ne contèa che la fea

cossì:

"Quatro oci e dò stanghete

magna rospi e cavalete!"

Che brùt che 'l era

cò i te lo disea

e qualche olta te piandea

ma mi cò i mè ociài

ò sempre ben studià

e tute le scole ò sempre passà.

Quatro oci e dò stanghete

che à veder meio pol jutar

chi nò à fortuna tel vèder.

I ociài me à sempre jutà,

e anca adess

che son pì vecia

mi i cene ancora qua.

Quatro oci e dò stanghete

adess nessun lo dis pì

tut al mondo 'l è cambià

e 'l ocial paura pì 'l fà

'l è deventà nà moda

e tel cambia ogni dì

che fa grido e te fa bel

e cossi nessun diss pì

" Quatro oci e do stanghete

magna rospi e cavalete!".

'Na preghiera

Ciao Gesù

Ti che te nè varda da lassù

dè noi cossa pensitu?

An dì

te nè avea insegnà

che te 'sto mondo

s'era tuti fradei

ma ancora noi

no 'l avon ben imparà!

Atu vist

quante guère se fon

un contro 'l altro

e intant la gente mor

senza sàver al parchè?

'Na preghiera ghe olarie

par jutarne à cambiar.

'Na preghiera ghe olarie

par insegnarne a pregar.

Atu vist Gesù

che nò sàvon pì far

gnanca quel?

'Na preghiera ghe olarie

anca par chi

la tò Cross

ol tirar via e no' vederla pì!

Ma par fortuna

entro i nostri cor

sempre la resta

parchè la fede

nò la mor.

Scolta Gesù

Ti che tè se lassù

'na preghiera par noi

dinela Ti,

parchè solche al tò amor

al ne salverà

fin che reston

te stò mondo sbaglià.

'Na candela

Sora la tòla

'na candela impizhada,

la fiama che bala,

che trema tel scur

ogni òlta che l'aria

la gira sui mur,

con doghi de luce

che fà mili ombrie

e strane figure

che nass da folie.

Vardando 'sti doghi

co' pensieri la mente

la te porta lontan

da 'sto mondo sofrente.

Te pensa al doman,

a quel che sarà

ai di quei pa§§adi

al mondo cambià!

E intant che i pensieri

te svòda la mente

la candela la e là

de cera piangente,

ma la sò fiama

anca se fioca

i tristi pensier,

ades la te bloca,

e quel che prima

te vedea de scur

adess al deventa

pì ciaro segur.

Sora la tòla ghe nè

'na candela impizhada

la so fiama la bàla

e intant al tò cor

al varda e 'l mormora

'na preghiera al Signor.

San Gregorio.

Ai piè del Pizhòc

ghe nè San Gregorio.

An sciàp dè case

e la cesa

i fa la piazha de 'sto paese.

Grùm dè case

semenade qua e là

a 'sto paeset

piantà su la montagna

i fa da cornise

e i lo fa pì bèl.

Qua ghe nè

aria bòna e sana

e nè par dè aver catà

la cucagna.

La gente dè 'sto posto la laòra

e la sè da da far

par poder magnar.

Quel che 'na òlta

i veci i ne à insegnà

qua se fa dè tut

parchè nol gnene desmentegà!

Ai piè del Pizhòc

ghe nè San Gregorio

e chi qua 'l è na§§est

'na òlta 'ndat via par laòrar

cò i va in pension

qua i òl tornar.

Ai piè del Pizhòc

ghe nè San Gregorio

e se nessun crèt

che qua se sta ben

i gnene a veder

e dè segur

va via content

dè er vist

'sto bel paeset.

Menù

Contatti

Poesie dialettali